اغبى وزاره فى مصر

قررت وزارتنا الميمونه " التربيه والتعليم سابقاّ " الحاق العقود المميزه والى انا منها بركب التنميه الى خلى بلدنا تتقدم بينا والزمتنا بشروط محكمه حتى تضمن تمام حسن سير العمليه التعلميه ومن هذه الافتكاسات اننا ناخد دبلومه تربيه اوتربوى وبما انى انا اساسا خريجة اداب علم نفس وبشتغل اخصائيه نفسيه (وللتوضيح فقط الفرق بين الاخصائى النفسى والطبيب النفسى ان الطبيب فى استطاعته ان يكتب ادويه ورشته علاجيه اما نحن فلا ولكننا نشترك معه فى كاااااااااااافه الاختصاصات الاخرى ) معنى كده انى مش هاعمل حاجه بالدبلومه دى لا ولا اخصائيه المكتبه ولا اى حد مش بيدرس لكن تقول لمين واروح لمين ينصفنى منهم

قولت يابت ولا يهمك ايه يعنى 1000 جنيه يروحوا فى الارض (دى المصاريف بس يعنى لسه الكتب والمواصلات و.....و....) ما انتى برضوا مرتبك كبير ولازم تزكى عنه بالمناسبه مرتبى حاليا 320 جنيه وكمان بقبضه كل شهرين

المهم بقى انهم كمان عمالين يغلسوا علينا فى الورق الى مطلوب للتقديم واخر حاجه قال ايه بما انى بشتغل فلازم اخدها على سنتين وعلشان اقدر اعمل كده لازم اجيب من الكليه بتاعتى تقدراتى بتاعت الاربع سنين ده غير ورقه كده من المجلس الاعلى للجامعات والورق ده بقى بياخد لوحده شهر على ما يخلص وبكده يكون معاد التقديم فات والتعلب فات فات وفى ديله 3 سنين قهر وزل علشان نتثبت

المهم ان دى مشكله عامه لكل العقود والناس عماله تلف حولين نفسها محدش عارف يعمل ايه والمهم اننا عارفين ان ما فيش تثبيت ولا زفت وان كل ده علشان ما نقدرشى نطالب باى حقوق لينا فاكرين قصه الحصان والجزه هما حاطين الموضوع بتاع التثبيت ده زى الجزره قدام عنينا علشان نفضل نجرى نجرى لحد ما نقع مع ان الجزره دى مربوطه فى رأسنا يعنى عمرنا ما هانطولها

بجد والله انا مش عارفه اعمل ايه هاموت من الغيظ والناس كلها سلبيه فظيعه مع انها مشكله عامه يعنى لو كلنا قولنا لا مش هانفذ العبط ده ممكن الحياه تتغير لكن انت بتأذن فى مالطه مالطه مين انت بتكلم ناس طرشه