النداء الاخير

اتكلمنا كتير واستفاضنا فى شرح ليه لازم نقاطع مسرحيه الانتخابات الهزليه والناس خلاص حسمت امرها ما بين مشارك ومساند ومراقب .... وبصراحه كنت ناويه انى ما اتكلمشى تانى فى الموضوع ده لانى حسيت انى بحرت فى البحر ..... بس حصل موقفين خلونى اعدل عن قرارى ده ......

اولا : فى تهديد ببطلان للانتخابات نتيجة ثلاث اسباب :-

1- رفض وزارة الداخليه واللجنة العليا للانتخابات تنفيذ أحكام قضائية تتعلق بإعادة أسماء مرشحين معارضين استبعدتهم السلطات الأمنية.

2- صدور عدة أحكام بإلغاء الانتخابات في 24 دائرة بعدة محافظات .

3- الإفراط في التدخلات الإدارية والأمنية في سير العملية الانتخابية.

وده معناه ان مجلس الشعب هايكون باطل وما ينفعشى يحلف أمامه الرئيس القادم اليمين .....يعنى كل المجهود الى بذله الحزب الوطنى والنظام للحفاظ على شرعيته بتقع...... نساعده احنا ليه فى البقاء على صدورنا بمشاركتنا له فى الانتخابات ولا احنا ما نقدرشى نعيش من غيره !!!!!!!!!!!!!! ولا احنا مش مصدقين فعلا اننا نقدر نتخلص منه ....وعاملين نلف فى دوائر مغلقه !!!!!!!

ثانيا : النهارده ركبت مع سواق تاكسى وحكالى انه امبارح هرب بعد معاناه من انه يتاخد بالعفيه فى حوار الانتخابات وانه يفضل يوصل فى ناس وينقل صنديق وانه كان بيوصل ناس فى الدخليه وقالولوا ان الموضوع محسوم وانهم رايحين يخلصوا الموضوع - ايوا الدليل قالولوا - انه سمعهم وهما بيطمنوا الناس بالتليفون ان الدايره دى خلاص بقت بتاعتك وما تشلشى هم !!!!!!

عايزين تانى ايه بقى ...... ولا هوالجرى فى المكان بقى ادمان ...... النداء الاخير لكل ذى عقل وقلب وبصيره.... لا تشارك فى مهزلة الانتخابات... لا تكون شاهد زور..... انزع كل اجهزة التنفس الصناعى عن النظام.... كن اول مسمار يدق فى نعشه