اول مره استفتى يا قلبى :)

اول مره استفتى يا قلبى :) واول مره اتهنى ..... كنت عماله اغنيها من اول ما صحيت النهارده :)

الحمد لله حمدا كثير طيبا مبارك فيه ..... بجد انا فرحانه جدا النهارده ... اول مره امارس حقوقى السياسيه بشكل طبيعى من غير قمع ولا ارهاب و خوف ... نزلت النهارده انا وماما واخويا و رحنا الى اقرب لجنه انتخابيه لينا و كل واحدفينا قال رأيه ... ببساطه من غير تعقيدات الكشوف الانتخابيه ولامأساة البطاقه الانتخابيه ... احلى حاجه ان النهارده كل لناس كانت بتشجع بعضها على المشاركه ... من اول سواق التاكسى الى سألنا : هاااااااااا روحتوا الاستفتاء ولا لسه ؟ ... لحد ما وقفنا فى الطابور علشان ندخل اللجنه ... كانت الناس كلها بتسلم على بعض بسعاده واحساس بالزهو ... اصبح لينا صوت يتسمع وبيفرق ... خلاص ما بقيناش كمالة عدد ... واحنا فى اللجنه اتبعنا التعليمات ... كل واحد شافوا بطاقته وتسجل اسمه ورقمه القومى وبعد كده بصمنا ... وخدنا بطاقه التصويت ... واكدوا علينا اننا نفحصها كويس ونتأكد انها مختومه ومافيهاش اى علامات ممكن تبطل الصوت ..... بعد كده انا علمت على الدايره الخضراء ..الى بتقول نعم ... وايدت البطاقه لمسئول اللجنه الى حطها فى الصندوق الزجاجى قدامى وبعد كده غمست اصبعى فى الحبر الفسفورى ... وشكرت رئيس اللجنه وخدت امى وخرجت .... من اول ما تدخل اللجنه الناس بتتعمل معاك بترحاب من اول نقيب الجيش الى على الباب لحد العاملين فى اللجان ... وشوشهم منوره كأنها بتنطق من السعاده .... الاطفال بره الجنه عمالين يغنوا ... ارفع راسك فوق انت مصرى .... كان فى ناس من كل الاعمار من الشباب الى شباب فوق السبعين ... على فكره انا امى كان عندها بطاقه انتخابيه بس عمرها ما راحت ولا شاركة فى اى انتخابات لانهم كانوا بيخدوهم فى اتوبيسات عندها فى الشغل لحد اللجان ... كانت بتنزل من الاتوبيس وتاخد بعضها وتروح .. كانت بتمارس العصيان المدنى لوحدها حتى من قبل ما اكلمها عليه .... ماما عندها 64 سنه واول مره تشارك وناويه تشارك فى كل انتخابات بعد كده ... ايان كان نتجيه الاستفتاء ... انا النهارده حسيت انى نجت ... وان تعبنا ما رحشى على الفاضى ... الحمد لله