الحكم بالمراسله

دى احدث صيحات التغير المستورده من الخارج تقفيل امريكانى انك تقول على نفسك انك مرشح شعبى وتفضل عايش بعيد عن البلد الى انت مرشح نفسك فيها وتعملك اكونت على الفيس بوك ولا تويتر وبقى تدخل كل شويه تكتب كلمتين وكان الله بالسر عليم

تتعب نفسك ليه وتنزل الشارع وتخطلط بالناس وتتعامل معاهم على انهم بشر ؟ وتواجه عساكر أمن مركزى ولا ظابط أمن دوله ليه ؟ بدل ما كل الى انت عايزه ممكن يتعمل من بعيد ؟ وعلشان منظرك ما يبقاش وحش قوى يعنى ممكن تبقى تجى زياره سريعه كده .... اه ما يابخت من زار وخفف ...... تتكلم مع الجريده دى ..وتعمل لقاء مع القناه دى .. وتروح تتصور فى الازهر ولا الحسين وتتقابل مع شويه شباب .... يعنى تخلص كل حاجه فى كام يوم كده وتسافر بعيدها علطول علشان تستجم لانك تعبت بقى ولازم حبه ترفيه

اما الناس الى صدقتك واضحك عليها بالشوه ده ونزلوا يجمعوا لك فى توقيعات ويقنعوا الناس انها نتخبك ممكن تبقى تبعتلهم كلمتين تشجيع.... لكن لو اتقبض عليهم ولا اتسحلوا فى الشوارع تطلع تزعق فيهم وتقول انهم لام تصرفوا فى حدود ما تسمح بيه الدوله !!!! اه احنا مش ناس عايشين فى غابه ....... لا فى دوله وفى قانون لازم يحترم

طب بذمتكم ده كلام منطقى ولا ده مشهد كوميدى فى فيلم هابط ...... للاسف ده الى بيحصل دلوقتى فعلا والمشكله بجد ان فى ناس فعلا مصدقه ان البردعى هو الى ها يصلح وهو الى ها يغير (من منازلهم اكيد) أفيقوا يرحمكم الله.. ما فيش تغير بيحصل من غير حركه والحركه مكانها الشارع والشارع يعنى الاماكن الى بيعيش فيها سكان مصر مش سلالم نقابة الصحفين ( ده حتى ما جاش وقف عليها مره )

فى ناس بتطلع تقولى ماهو اوباما استخدم فى حملته الانتخابيه تويتر ......... جميل طب ونسيوا ليه بقى انه كان بعقد كل شويه مناظرات ويلتقى بالناس وبعدين كل بلد ليها خصوصيتها ولا هو ناوى ياخد المشهد الامريكى قص ولزق من غير اى تعديل علشان يناسب الثقافه والمجتمع المصرى ...... وياريته حتى بيدير الحمله الانتخابيه بتاعته زى اوباما لا ده بياخد الى يناسبه منها فقط من غير ما يدخل فى اى صراع حقيقى مع النظام

الغريب بقى ان مطالب البرادعى اقل من السقف الى وصلت ليه المعارضه حاليا بمعنى انه بيطالب بتغير 3 مواد من الدستور والى حتى لو عرف يغيرها ( بالطريقه الجديده دى ) عمرها ما ها تعمل فرق لان نظامنا ما بيطبقشى اى قوانين ولا بيعترف الا بالحاجه الى فى مصلحته وبس

هايطلعلى حد يقولى" يعنى انتى ما بيعجبكيش العجب " " طب انتى عايزه ايه ؟ "

ببساطه شديده النظام ده مش محتاج اصلاح ده محتاج بتر من الجذور بمعنى ان الاشتراك فى اى انتخابات هزليه يبقى اشتراك فى مد عمر هذا النظام الحل هو اعلان عدم مشروعيه لنظام والعمل على تغيره عن طريق العصيان المدنى الذى يتم عن طريق الناس مش من البيت الابيض والى ها يجى ويقولى ان الشعب ده ما يقدرشى او لسه وعيه ناقص ها قوله شوف العمال البسطاء المعتصمين امام مجلس الوزراء بيطورا ازاى و لوحدهم من غير فيس بوك ولا تويتر ولا دورات فى التغير من فريدم هاوس وبطلوا تبرروا عجزكم وضعفكم بان الناس مش واعيه

اعلان عدم مشروعيه النظام واطرح مشروعك كامل ورؤيتك بمنتهى المصداقيه ساعتها بس ها تلاقى الناس بتتلتف وراك لكن تفضل تتكلم فى تعديل دستور او تغير مواد يبقى انت بتحرت فى البحر