نظرية الكر

صاحبة النظريه دى هى " علاء عبد الصبور " بطلة مسلسل " انا عايزه اتجوز " والى بتقول ان لما يبقى فى مجموعه من البنات اصحاب وواحده فبهم تتخطب الباقى بيكروراها علطول وبتكون دى فاتحة خير .....

وده ينطبق تماما على حال شباب مصر بعد الى حصل فى تونس.... الناس حست ان منظرهم وحش جداااااا علشان بقلهم زمن بيقولوا " احنا هانتخلص من مبارك ... والله هانخلص خلاص ... استنوا وشوفونا هانعمل ايه .... احنا درسنا الثورات الملونه والابيض والاسود كمان ..... احنا وقعنا على بيان التغير ... وماشين على تعليمات تويتر بالحرف " ..... وتجى تونس تشيل بن على فى اقل من شهر من غير فريدم هوس ولا صربيا ولا امريكا ولا تويتر ولا فيس بوك ...... قاموا قرروا اننا مش اقل من تونس واحنا بعون الله نقدر نعمل ثوره بعديهم بكام يوم علشان ميبقاش حد احسن من حد اه .... وعلشان بقى نحن نختلف عن الاخرين تماما .... قررنا ان ثورتنا هاتبفى يوم 25 يناير الساعه 3 الظهر علشان ماحدش يكون عنده حجه اه..... نخلص الى ورانا كله الصبح وبعدين ننزل نعمل ثوره .... وعلشان الناس الى مش بتعرف تصحى بدرى اه ما دول برضوا من حقهم انهم يشاركوا ايه مالهمشى نفس يايعنى .... وكمان علشان نكون فطرنا واتغدينا اصل ما ينفعشى الثوره على معده فاضبه مش حلوه على المريئ .... وكمان بقى سمينا الثوره بتاعتنا الى لسه ما قامتشى بثوره اللوتس اه هو احنا لا سمح الله اقل من الثوانسه الى سموها ثورة الياسمين .... فاضل ايييه؟؟؟!!!! اه فى لحد دلوقتى 9 ولعوا فى نفسهم فى اماكن مختلفه ...... اصل احنا 80 مليون مش زى تونس 10 مليون بس ..... فا احنا محتاجين عدد اكبر مش واحد بس زى محمد البوعزيزى

ارجوكم ما حدش يفهم من كلامى انى ضد اننا نتحرك علشان نشيل مبارك بالعكس .... انا مستبشره جدا بحماس ناس كتير كانت بتتفرج وبس ..... الى انا ضده اننا نتعامل مع الوضوع بمنطق الفلهوه الى اصبح اساسى فى حياتنا ..... ما فيش حاجه فى الدنيا اسمها انا نازل اعمل ثوره .... انا خايفه الناس المتحمسه دى تصاب باحباط جامد لو كان اليوم فى العادى او حتى اكتر شويه .... وبعدين احنا ما شوفناش من انتفاضة تونس الا اننا نولع فى نفسنا .... صحيح ان فى مصر كل يوم بيبقى فى 13 حاله انتحار ..... بس ده مش الى هايحرك الناس ..... كانوا اتحركوا ساعة قطر العياط ولا غرق العباره ولا حتى ضخرة الدويقه ...... الناس هاتتحرك لما تلاقينا بنعارض بجد وعندنا مشروع .... لما يلاقونا بنقدم تضحيات بجد مش بنروح علشان نتصور ....

انا عمرى ما كفرت بشعب مصر ولا قولت عليه انه مات .... لانى متأكده انه واعى جدا وعارف الحقيقه وعارف مين الى بيشتغل بجد و مين الى بيمثل ..... وهفضل اراهن على الشعب ده ...... ومتأكده ان نظام مبارك فى اخر ايامه وان كل مره بننزل الشارع فبها بتقرب نهايته اكتر ..... بس ارجوكم بلاش حماسنا يكون غير واقعى علشان ما نكونشى بنضلل الشارع

هاننزل يوم 25 يناير واحنا كلنا اصرار ان صوتنا يوصل للناس وهانفضل نفتت جدار الخوف الى بيعتمد عليه النظام فى مص دمنا ..... ومش هايكون نفسنا قصير .... هانستمر ونستمر لحد ما نتحرر ..... ارجوكم بلاش حد يحبط ويزهق لو كان اليوم مش زى الى فى حلمنا ..... يوم 25 مش نهايه المطاف ...