نحكى الحكايه من الاول .. كل الناس فى مصر عايزه دستور جديد بس اتقسموا نصيين بالملى ولكل منهم حجته ومنطقه ودلائله براهينه ... لحد هنا كويس ...الى مش كويس بقى اننا لسه بنتعامل بنفس المنطق القديم ايام النظام البائد ... الى مش موافق على وجهة نظرى يبقى خاين .... واضح اننا لسه ما اسوعبناش اننا فى مرحله جديده من حياتنا .. مش هايبقى فيها الدنيا واضحه زى الاول يعنى زمان كان واضح جدا ان فى ناس مع النظام وناس ضده لكن دلوقتى احنا كلنا وطنيين وعايزين مصلحة بلدنا واختلافنا مع بعض ده شى منطقى ومبرر لكن الى لا يمكن انى اقبله انك تمحى كل تاريخى بجرت قلم لمجرد انى اختلفت معاك فى الرؤيه
الرسول لما قبل بشروط صلح الحديبيه برغم من انها كانت مجحفه للمسلمين وبرغم ان فيها مزايا للمشركين هل كان اقل ثوريهوخوفا على دين الله من عمر ابن الخطب الى لف على الصحابه يسألهم " لماذا نعطى الدنيه فى ديننا " .... والى ها يقولى ان الحزب الوطنى قال " نعم " على التعديلات ..هاقوله امريكا بقى عايزانا نقول " لا" ...معنى كده اننا المفروض بقى نبطل صوتنا علشان ما حدش يخونا ولا يقولنا انتوا بضيعوا دم الشهداء ... ما احنا ما عملناش كل ده وضحينا بكل ده علشان فى الاخر نرجع تانى ونبطل صوتنا ..... اخونى ارجوكم قليلا من العقل ...قول وجهة نظرك زى ما انت عايز بس من غير مزايادات ولا اتهامات .... ومش معنى انى بفضل انى اركب مترو الانفاق وانت بتحب الاتوبييس يبقى احنا اعداء الاتنين فى الاخر ها يوصلونا للهدف الرئيسى بتاعنا وهو دستور جديد
مافيش كارثة حتحصل من نتيجة الاستفتاء ده، ومافيش حد من اللي بيقول لا او نعم متآمرين على البلد.. خلاص، احنا خلصنا المحطة دي وقلبنا على محطة نجوم اف ام..لو النتيجة طلعت نعم.. مافيش مبارك آخر حييجي، ومافيش كارثة، ومافيش تسليم للبلد، ومافيش اجهاض للثورة، ولو النتيجة طلعت لا مافيش امريكان حيحتلوا البلد، ومافيش اسرائيل حتجيب عميل لها يحكمنا، ومافيش تقسيم لمصرعشان نبقى واضحين يعني
انا عن نفسى افضل الحكم المدنى على الحكم العسكرى ...وعلشان كده ها قول " نعم " فى الاستفتاء .. انا شايفه ان الجيش خلاص حط صوابعه العشره منا فى الشق مش عارف يرضينا ازاى وخصوصا اننا عمالين نتخانق ونعض فى بعض ..عادى اصل المناقشه عندنا فى مصر لازم تكون متحبشه كده بشويه خناقات وضرب ... بس ده شئ مربك جدا للجيش الى متعود على ان فى قياده واحده وانها هى بس الى بتتكلم مش 50 واحد بيتكلموا وكلهم ظاهريا عكس بعض....
وهنا اقتبس بعض الكلام لنوره نجم :
" يعني مثلا.. المادة التانية مش حتتغير، حتنزل زي ما هي وحتفضل.. انا باواجهكم بالحقيقة عشان ماحدش يتشنج لي
ليه بقى؟ عشان هي دي الديمقراطية، الدستور الجديد يختلف عن الدستور المؤقت، لأنه حيتصوت عليه مادة مادة، والمادة دي لو نزلت او نزل خيار الغاءها او حتى تعديلها، الناس حتصوت لصالح شكلها كده زي ما هي
بس برضه من حق اللي معترضين عليها انهم يعبروا عن نفسهم، ولو عايزين يعملوا مظاهرة يعملوا، ولو عايزين يعتصموا يعتصموا، ولو عايزين يرغوا يرغوا.. صح؟
طب ده بالذمة ينفع في وجود الشرطة العسكرية يا ناس؟ يعني افرض نزلوا يتظاهروا، قام نازل لهم ناس تانية يتظاهروا مع المادة، ينفع في الجو ده، وفي السخونة دي، والشرطة العسكرية قاعدة، والاحكام العرفية، ومحاكم عسكرية، الناس تعمل العملة دي؟
ما هو النقاش محتاج شرشحة وخناق، والجيش ما بيحبش الصوت العالي ولما بيلاقي مدنيين بيشرشحوا لبعض بيرنهم علقة هم الاتنين
- بالنسبة للمجلس الرئاسي
المجلس الرئاسي حكم عسكري بمشاركة مدنيين
يعني مش حيفرق حاجة.. ما هو اصلا ده قائم دلوقت، عندنا وزارة مدنية ومجلس عسكري، كل اللي حيحصل انهم حيتم دمجهم
لكن قانون الطوارئ حيفضل ساري طول ما احنا ما عندناش دستور
الشرطة العسكرية حتفضل قاعدة طول ما المجلس الرئاسي قاعد
المحاكم العسكرية حتفضل شغالة لأن الاحكام العرفية حتفضل موجودة لأن مافيش دستور اساسا
ومافيش حيبقى مجلس رئاسي مدني
لأنه سلطة غير شرعية، والجيش مش حيسلم السلطات لسلطة غير شرعية وغير منتخبة.. ايوة الجيش شرعي، لأنه جيش، ده جيش، له صفة، ايه صفة اعضاء المجلس الرئاسي؟ "
الى انا مش فهماه ليه احنا ثقتنا فى الحكم العسكرى اكبر من ثقتنا فى نفسنا !!!!!! المستشار طارق البشرى رئيس لجنة تعديل الدستور وأحد قمم الفكر فى مصر والعالم العربى والإسلامي يقول:
" أنا خايف ليحصل في مصر زي ما حصل سنة 54 .. كانت المفاضلة بين رجوع الأحزاب أو مجلس قيادة الثورة .. فطلعت مظاهرات تؤيد إستمرار مجلس قيادة الثورة وتقول تسقط الديمقراطية وهذا النظام غير الديمقراطى هو الى أكل كل انجازات عبد الناصر .. وقتها كانوا بيقولوا خايفين من عودة الباشوات تاني زي ما في ناس دلوقتيبيقولوا خايفين من الحزب الوطني والأخوان" .... وكما يقول فهمى هويدى : " ولا أظن أن الأحزاب التقليدية تحتاج إلى مهلة خصوصا أن بعضها له وجوده منذ ثلاثين عاما أو أكثر ــ كما أننى لا أظن أن ثمة قلقا من فلول الحزب الوطنى لأن أحدا لا يستطيع أن يترشح ممثلا له. ولذلك فإننى أزعم أن المنافسة الحقيقية ستكون بين الإخوان وبين القوى التى تستلهم روح الثورة، والأولون ليسوا بحاجة إلى مهلة، والآخرون يملكون رصيدا كافيا من الشعبية يمكن أن يتفوق على الإخوان. وهذا الرصيد قد يتراجع إذا تم تمديد المهلة. أما المستقلون فإنهم يستندون إلى رصيدهم المحلى فى دوائرهم، خدميا كان أم عائليا وتاريخيا، وهم أيضا ليسوا بحاجة إلى مهلة."اخيراّ انا أرفض الوصاية عى الشعب سواء من المؤيدين للتعديلات او الرافضين لها أرفض التخوين و المزايده ، اعرضوا رؤيتكم للشعب واتركوه يختار ولا تملوا عليه اختياراتكم ولا توجوهوه حيث تتجهون بل اطلعوه على الأمر واتركوه يختار ، نريد ديمقراطية حقيقية لا حشد للقطعان
0 التعليقات:
إرسال تعليق