الشعب " المفترى عليه "

" من المؤسف بعد ان انتهينا من نظام مبارك نجد الاخوان والسلفيين فى المشهد, ومن المؤسف ايضاً أن التعديلات الدستوريه الجديده تعطيهم الحق فى التواجد ,هل قام الشعب المصري بالثوره حتي يتربع على عرشها الاخوان " !!!!!!!!!!!!!

" الى بيفهموا بيقول ( لا ) للتعديلات الدستوريه واحنا معاهم " !!!!!!!!!!!!!!! على فكره دى كانت احدى اليفط المعلقه امام اللجنه الى كان فيها الاستفتاء لم استطع تصويرها تم ازلاتها للاسف

" لكل اللي قال نعم ، لقد خزوقتوناااا يا رجااالة مع إحترامي الكامل لرأيكم " !!!!!!!!!!!!!!!!!!!!!

" عايز ترقّعها ، أوكيه , بس لو حد سألك عن شرفها , ابقي اكذب عليه " !!!!!!!!!!!!!!!!!!!!

" أووكي الإخوان والسلفيين والشيوخ هيقولوا نعم ..... ماشي ، قشطة أوي .. يبقي يجي ديكتاتور يحطهم في المعتقلات تاني وإحنا ننزل الشارع نعارضه ، بس شعار الثورة الجديد ( الشعب يريد مفاتيح المعتقلات قبل إسقاط النظام ) وإبقوا تفوا في وش أمي لو طلّعنا المفاتيح لجنس مخلوق " !!!!!!!!

فى البدايه اريد ان اقول شئ .... انا كنت متردده جدا فى انى اكتب او اعلق على الى حصل قبل او بعد الاستفتاء وخصوصا بعد اعلان النتيجه .... بس بصراحه شديده حسيت انى لازم اقول ليه انا مابقتشى ارد او اتناقش مع حد فى الموضوع ده .... مش علشان انا معنديش منطق او علشان انا بتعالى وبشوف نفسى فوق النقد .... علشان النماذج البسيطه الى انا حططها فوق دى ...... بأى منطق او عقل او موضوعيه يتم الرد عليها .... ودى نقطة من غيث أمتلاء بيه الفيس وتويتر ..... انا هارد على بعض النقاط الى ممكن الرد عليها :

" الشعب المصرى اضحك عليه من الشيوخ والسلفين وفهموهم ان نعم دى لمصلحه الدين ولان شعبنا " مغيب " صدقهم " ...... الشعب المصرى متدين وعلشان تقدر تأثر عليه اقصر طريق تسلكه هو الدين .... ده صحيح ... بس الى مش صحيح انه مغيب او انه قال " نعم " تحت تاثير الجهل و الاميه واستخدام الشعارات الدينيه .... فا مثلا محمد حسين يعقوب و ابوا اسحاق الحوينى كانوا بيقولوا ان الخروج على الحاكم حرام ومع ذلك السلفين وكتير من اتباعهم نزلوا الى ميدان التحرير و ما عملوش غير الى مقتنعين بيه .... فا محدش يقولى ان السلفين قالوا " نعم " علشان يعقوب او الحوينى قالولهم كده .... وكمان فى المقابل عمرو خالد ومعز مسعود و صفوت حجازى قالوا " لا " وفى ناس كتير من محبيهم اختلفوا معاهم وصوتوا بالى هما شيفينه صح ..... والكنيسه كمان بعتت برقيات للشركات الى اصحبها مسيحين او الى اغلب العاملين فيها مسيحين علشان يصوتوا ب " لا " ومع ذلك فى مسيحين كتير قالوا نعم ومنهم ناس كانوا معايا فى طابور الدخول للجنه ..... يبقى ان الشعب مغيب دى عيبه فى حقنا احنا .... وحق الشعب الى تخلص من مبارك وبيكمل فى التخلص من نظامه .... ويبقى احنا الى فاكرين نفسنا بس الى عندنا وعى وبنعرف نفهم ونختار ونميز الكلام الى بيتقال لينا

" الاسلامين بيسعوا للوصول للسلطه منع غرهم من الوجود على الساحه لان الفتره الى قبل الانتخابات بسيطه مش هانلحق نعمل فيها حاجه وكده ها يبقى الى موجود على الساحه الاخوان بس " .... دى بقى شهاده للاخوان والسلفين انهم برغم كل انواع الحظر والتقيد عليهم ليهم الشعبيه الحقيقيه دى فى الشارع ...... والحقيقه بقى ان نظام مبارك كان بيساوى فى التقيد على كل الناس بس مثلا يعن

ى لما كان حد بيتقبض عليه من اى تيار اخر كان بيلاقى ناس تجرى وراه ( اخرهم يومين او شهرين سنه بالكتير ) وما كانشى بيفضل كتير قوى زى مثلا بهاء فزاع امين حزب العمل فى ملوى الى كل تهمته انه كان بيوزع مقالات للاستاذ مجدى حسين فى الصعيد وبقاله 7 سنين معتقل ولحد الان لم يخرج مع انه داخل على بدايه فشل كلوى ..... فا محدش يقولى اصلنا كنا متضهدين او مش عارفين نشتغل ولا نكون شعبيه فى الشارع ........لو نبطل نعمل استعراضات للقوه فى العالم الافتراضى ونشتغل فى الشارع اكيد هتلاقى ناس تقتنع بمنهجك

" انتوا بعتوا دم الشهداء ... انتوا خونه " انا بقى حا حط ليكم صوره فيها اعداد الى قالوا نعم فى المحافظات ومحدده انا محافظه السويس و اسكندريه الى هما اكتر محافظات مات منها ناس استشهدت ومع ذلك اهلى الناس دى قالوا " نعم " فهل هما باعوا دم ولادهم !!!!!!!

طب انا هافترض معاكم ان شعب مصرى عبيط واضحك عليه المرادى ..... عملتوا ايه علشان ما يضحكشى عليه المره الى جايه ..... نزلتولوا واتكلمتوا معاه فى الشارع .... فكرتوا فى حملة توعيه .... قررتوا طرح افكركم من غير مزايدات على حد ولا تخوين ..... ولا الهجوم على الفيس وتويتر اسهل ..... وللعلم بقى طول ما الهجوم على الاخوان والسلفين والتيار الاسلامى بوجه عام شغال ده نوع من انواع الدعايه المجانيه لانكم بتهاجموا فى الاعلام.... فى العالم الافتراضى.... لكن فى الشارع الناس الى انتوا بتقولوا عليهم مغيبين وجهله ما بيلقوش غيرهم وبدافع الفضول او التحقق من صحة ادعائتكم بيرحوا يشفوهم ويتعاملوا معاهم ....... انا قولت الى فى قلبى وخلصت ضميرى قدام ربنا ...... ومش هادخل فى اى جدال عقيم من ده تانى لانى ورايا مشروع بيحتاج منى كل دقيقه فى الدعوه ليه ..... والله الى عايز ينزل يشتغل ما حدش ها يمنعه والى عايز يفضل يشتم ويهاجم ويعلم علينا وياخد نقط برضوا براحته