للذكري :)

أكتشف بالصدفه البحته ان النهارده 6/ابريل/2011 ..... عادة انا مش بركز فى الايام او التواريخ الا اذا كانت ليها ذكرى هامه عندى .... وطبعا يوم 6 ابريل له اهم ذكرى فى وجدانى ..... انا كنت براقب الاوضاع من بعيد من ايام ما كنت فى الجامعه ..كنت كمان ساعات بشترك فى المظاهرات الى كانت عندنا واغلبها كانت علشان فلسطين لكن عمرى ما حد اتكلم معايا ولا عرض عليا افكار .... لحد ما دخلت الفيس بوك قبل اضراب 6 ابريل 2008 ..... كنت متحمسه جدا للفكره ولسه فاكره يوميها ان فى اولياء أمور كتير كانوا بيسألونى هو فعلا فيه اضراب يوميها ونجيب الولاد ولا لا ...... بس ما اسعدنيش الحظ انى اقابل حد من مجموعه شباب 6 ابريل الا فى مارس 2009 ..... لسه فاكره او اجتماع للعضويه الجديده ...ولسه فاكره ازاى اتعرفت على محمد منير يوميها ...كان اول حد عرفته ....ويوميها برضوا اتعرفت على فاتن الوكيل ومنه شرف الدين .... وركبنا مع بض مترو الانفاق .... وبعد كده اتعرفت على " بنت مصر قومية اسلاميه " او مديحه قرقر و محمد عزيز وضياء الصاوى وفاطمه الوكيل و وليد خيرى .... لسه فاكره يوم 6 ابريل 2009 كانت اول مظاهره احضرها بره الجامعه ... كانت على سلم نقابة الصحفيين الى كنت اول مره اروحها ... واول مره اهتف " يسقط يسقط حسنى مبارك " وازاى كان صوتى مش طالع :) .... وبعد كده وقعت فى غرام الهتاف ده بالذات ...كنت بقوله بكل خليه فيا ... ولسه فاكره يوم 16/ 4/ 2009 .... اليوم ده كان فى حفلة لتكريم الناس الى اعتقلت قبل سته ابريل كان فى بنتين ... امنيه وساره وكان فى شباب راحوا اضمنوا معاهم واعقلواه هما كمان نور حمدى وشمس الفخاخرى ومحمد عواد وساره رمضان .... اليوم ده ضياء اهدانى كتاب " ادعوكم الى العصيان " للمستشار طارق البشرى ... وبدأت طريقى فى القراءه وبلورة افكارى وتعرفت على حزب العمل ..... فى الزمن سنتين مش وقت كبير ...لكن انا بعتبرهم بعمرى كله اتعلمت فيهم كتير وقابلت اعز الناس الى قلبى .... كفايه انى طلعت منهم بهدف ورساله انا عايشه ليها وباجدع ناس قابلتهم فى حياتى ...بجد شكرا جدا ليكم ...

ملحوظه : الصوره دى اول صوره ليا فى مظاهره يوم 6 ابريل 2009 على سلم النقابه والى صورهالى محمد منير ولاحظوا الابتسامه العرررررررريضه جدا والفرحه الى انا فيها كأنى مش متحاوطه بــ 6000 عسكرى على الاقل ولا كأن فى اى حاجه فى الدنيا ..... ايام