فى ذكرى حرب اكتوبر ... وجول مجدى عبد الغنى التاريخى

# فضفضه ... #للتاريخ 

النهارده 6 أكتوبر 2015 يعنى عدى على ذكرى الحرب حاجه واربعين سنه وكل سنه نقعد نعيد ونزيد عن الروعه والحلاوه بتاعتنا وازاى رجعنا سينا كامله لينا ومصر اليوم فى عيد ... مع ان الى حصل اننا عملنا حاجه حلوه جدا وجيه السادات رمى عليها تراب باتفاقية كامب ديفيد الى مكبلنا لحد الان  

لحد الان سينا صحراء ... لحد الان بنخون البدو وبنقول عليهم يستاهلوا وانهم زى الصهاينه .. لحد الان مش من حقى ادخل سيناء علشان اسمى فى قوائم الممنوعين من ساعة قافلة غزه 2009 

الحرب دى الى بقت الباب السحرى لاي حد انه يستغلنا ويسرقنا لمجرد انه شارك فيها فى يوم وبرغم ان السيسى كان لسه بالشورت ساعتها لكن بيتمسح فيها

زي جول مجدى عبد الغنى فى مبارة هولندا عام 1990 لم يحظ هذا الهدف بالشهرة بحكم أنه سُجل فى كأس العالم، أو أنه الوحيد للمنتخب فى المونديال، وإنما للترويج غير العادى الذى قام به مجدى عبد الغنى صاحب الهدف، فى غالبية لقاءاته بوسائل الإعلام سواء كان ضيفا أو مقدما لبرنامج. تجدر الإشارة إلى أن هذا الهدف، الذى جاء من ركلة جزاء، حصل عليها حسام حسن، لم يصعد بمصر إلى الدور الثانى بالبطولة، حيث خرجت مصر من الدور الأول.

أنا عمرى ما أتأمرت

ولا حطيت شروطى

ومكان ما ترسى مركبك

بابنى شطوطى

أنا كنت جيشك لما مماليلك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

دة انا كل شبر فى أرضك اتمرمغت فيه

وكل يوم عشتيه

أنا اتغذبت بيه

بتكرهينى عيونك السودة

وأيامى اللى فاتت

مانتيش حبيبيتى من النهاردة

حبيبنتى ماتت

انا الى ابويا علمنى حب البلد دى ابويا الى اطوع فى الجيش وحضر حرب اليمن و 67 ونجى بأعجوبه من الموت فى ممر متلا وحرب الاستنزاف وحرب اكتوبر .. ابويا الى كل مره كنا نصحيه فيها من النوم كان يقوم مفزوع ويحكي لينا عن اصحابو الى شالهم حتت .. ابويا الى كان بيعرف نوع الطيارات من صوتها وان كانت شايله صواريخ ولا لا .... الى كانت نشرة 9 بالنسبه لينا مقدسه لازم نتلم حوليها كل يوم وبعديها يا نتفرج على قلم رصاص بتاع حمدى قنديل يا اما اختراق لعمرو الليثى .... ابويا الى مخدشي من الجيش حاجه غير نوم مقطع وذكرى محفوره فى جبينه لاصحابه الميتين وشهادة تقدير لدوره فى حرب اكتوبر .... الى كان بيجمعنا ويحكي لينا ازاى كان مسؤل عن تصليح الكبارى على القناه وان اى دبابه او مركبه لازم تعدى فى وقت معين و لو عطلت يسحبوها علشان ما تعطلشي الباقين

ابويا لو كان عاش وشاف الى حصل وازاى الجيش بقى مالوش غير فى قاعات الافراح و الحلل والكحك و اتاوة الطريق الصحراوى كان جاتله جلطه .... لما غزه المحاصره تعمل طياره بدون طيار وصوريخها توصل تل الربيع وتعدى فوق الكنست الى السادات باعنا فيه لليهود 

انا كل ما اتذكر نحية العلم يسرح خيالي

كان صوتي لسه عيالي .. بس عالي
كنت احسّ اني بهزّ المدرسة
كان العلم من فرحته يرقص على الساري شايله
طب كنتو ليه بتعلمونا نحفظ البرّ وجمايله
طب كنتو ليه بتعلمونا نكره الظلم وعمايله
لمّـا انتو ناويين تسجنونا في ارضنا
كان ايه لزوم العلم .. وهمومه .. ورزايله
طب كنتو سبتونا بهايم كنا نِمْنَــا مرتاحين
ازاي ابيع ارضي وعارف ان جسمي اصله طين
طب كنتو علمتونا مثلا اننا من اصل تركي
او اوروبي
ان جسمنا اصله حلاوة او مِلَبَّس
اشمعنى طين ؟؟؟
طب ولما الطين يروح .. ايه اللي فاضل ؟؟
ولمين نغني ونفدِي روح ؟؟ ولمين نناضل ؟؟؟؟
ولمين اعود واشتاق واحب واغير واكافح ؟؟
ولمين اغني واقول ( بحبك يا بلد) والحب طافح ؟؟

برغم انى بقول بلسانى انى مابقاش ليا فى البلد دى غير صحابى المعتقلين بس طلع ده كمان كدب للاسف انا لسه بحبها ويمكن تريقتى وقهرتى هى المتغلبه دلوقتى ولو رجع بيا الزمن تانى كنت هشارك تانى واتمرمط تانى 

كان نفسى مصر تبقى حاجه حلوه بجد وكان نفسى ابقى فخوره انى مصريه بجد وكان نفسى كل الى عايشين هنا يتعاملوا على انهم بشر وليهم حقوق وكنت مستعده ادفع تمن ده وانا راضيه 

علا صوت أدانك جرس
فى الشدة صاحينلك
من امتى كانوا الحرس
هما اللى باقينلك

بعتينى علشانهم
وعنيكى معصوبة
ياهلترى خاينة
ولا زيى مغصوبة

كل الكلام اتقال
والشعر بقى ماسخ
والصبر علو جبال
والظلم شىء راسخ
وطن وغرقان فى النطاعة
كل شىء ريحته نطاعة

كان نفسى يبقى ليا جيش بجد ... جيش عرف مهمته ايه وبيدرب علشان ده وبيصنع سلاح يقدر يدافع بيه عننا مش مؤسسه عسكريه ليها نشاط اقتصادى وبزنس وعمولات والى داخل فيه يتهان لحد ما يخرج ولا يتعلم غير المحلسه والكلام المهاود علشان الايام تعدى

أنا اللى صاحب البيت
عايش بدون لازمة
ولما مرة شكيت
إدونى بالجزمة

كرامتنا متهانة
واللقمة بإهانة
بتخلفينا ليه لما انتى كارهانا

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

والله يا مصر انا مش عارفه اكرهك وارتاح .. اطلعك من جوايا وابيعك بالرخيص زى ما انتى بيعانا انتى الى بتعلى الواطى وكل ما نكسر ليكى صنم تبنى غيره وتعبديه

كل اللى بيقولك بحبك دول نفاق
أنا لما قلت لك بحبك
كان نفاق

الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة