العنوان ممكن يجعلكم تصورون انى هاتكلم عن أنتخابات مجلس الشعب القادمه او حتى أنتخابات الرئاسه ... ماتخلوش خيالكم يروح لبعيد ...انا هاتكلم عن واقعه حصل عندنا فى المدرسه فى أنتخاب أمناء الفصول ......
فلاش باك سريع كده مع موسيقى الف ليله وليله ......... يحكى ان فى مدرستنا الموقره تجرى أنتخابات لجميع الفصول لأختيار أمين وأمين مساعد للفصل.... والى بتكون مهمتهم غالبا مساعدة المدرسين فى الاعمال الكتابيه الكتيرررررررررر الى كل شويه تبلينا بيها الوزاره وكمان يقومون بمهمه عظيمه وهامه وخطير وجليله وكل الصفات التى يمكن ان تقال إلا وهى انهم " بيقفوا على الفصل " ..... طبعا فى ناس مش فاهمه يعنى إيه ... ؟ ولا إيه اهميه ده ؟ ....احب اقولكم ان ده قصر نظر يا خونا ..... من واقع تجربتى الأليمه ..ان كل الاطفال فى المرحله الابتدائيه تتلخص احلامهم فى حاجتين ..... " انهم يطلعوا فى الاذاعة .. او يقفوا على الفصل " ... لدرجة ان فى اطفال بتجى تترجانى انها تقف على الفصل وتمارس سلطة تسكيته.... وبيلحوا عليا لدرجة انى ساعات بضعف من باب الشفقه... ومااقولكمشى على كم الفرحه والشعور بالزهو بيبقى قد ايه .... وحجم الغضب المكبوت لدى من تكون هذه هى مهمتة الاصليه ........ انا بحكى لكم كل المقدمه دى علشان تعرفوا اهميه هذه الانتخابات ومدى الاهتمام و الاقبال عليها
المهم يا ساده ...... فى هذا العام تمت الانتخابات بسلام فى كافة ارجاء المدرسه الا فصل واحد فى الصف الخامس .......... ليييييييييه هى دى بقى الحكايه ... الفصل ده عادة ما كانت تنجح فيه طالبه اسمها " أميره " كل عام علشان هى شاطره والمدرسين والطلبه الى معاها بيحبوها ....... لكن السنادى حصل شئ غير متوقع تماما ..... لقد فاز "عهد " .... طبعا فى ناس ها تسأل وايه المشكلة ان عهد يفوز ؟؟!!
عهد ده طالب جديد على الفصل ...لسه محول طازه ودى اول سنه ليه فى المدرسه ومصر لانه جاى من الامارات - هو مصرى وكان عايش هناك - المهم .... اخوكم عهد نزل بالبراشوط على الفصل الى انبهر بيه وحس انه هو المخلص من احتكار أميره للسلطه وخصوصا انه طيب و مهذب وكررررررررررررررررريم ...... من الاخر ملاك
قبل الانتخابات حصل موقف مهم ...... أميره كتبت اسماء ناس بتتكلم وما كتبتشى فيهم اسامى ناس اصحابها - ده حسب روايه شهود عيان - وكانت هذه هى القشه التى قصمت ظهر البعير ....... اخوكم عهد اجتمع بالاعضاء البارزين فى الفصل والى ليهم كلمه وهيبه فيه..... وقرروا التخلص من أميره .....وبداء المخطط الشيطانى ...... اولا : كل لما أمير تقف عليهم وتحاول تسكتهم لا يلتزموا باى اعراف ولا تقاليد بل يخرجوا عن السيطره بطريقه عنيفه ..فى حين ان لو المدرس اختار اى حد تانى يسمعوا كلامه فورا بدون اى مشاكل ...... ثانيا : عهد اصبح كرررررررررررريم زياده عن المعتاد مع الجميع .... ثالثا : تقليب الفصل على أميره عن طريق تذكير التلاميذ بأخطاءها ..... رابعا: صدر امر من " محمود " فتوة الفصل ...بأن اى حد ها ينتخب أميره ها يضرب ضربا شديدا حتى يستغيث ......
وهكذا سقطت لويز ... اقصد أميره ... وبقى "عهد " هو الاميييييييين للفصل و " محمود " الاميييييييين المساااااااااااااعد ....... شويه وكل شئ انكشف وباااااااان ...... اخوكم عهد ...النور الى فى وشه انطفا .... والادب راح... والاحترام حتى مع المدرسين انتهى.... و حتى لما لموا فلوس من بعضهم ضربها فى جيبه..... وغااااااااااااب بعهدها 8 ايام ولما رجع قالهم انا ما خدتش منكم حاجه .....
دلوقتى عرفوا ان عهد ضحك عليهم و مش عارفين يعملوا فيه ايه ...... انتهت القصه والعاقبه عندكم فى المسرات
0 التعليقات:
إرسال تعليق