انا هاكتب كل الى يمليه عليا ضميرى ودى معذره الى الله ...... لان الاوضاع وصلت لمرحلة من العبثيه الغير مبرره
من يوم 8 يوليو وفيه حاجات كتير بتحصل غريبه جدا ومش طبيعيه بتخلى الناس ماتتعاطفشى مع مطالب المتظاهرين زى مثلا غلق مجمع التحرير والتهديد بغلق مترو الانفاق ..... وانتهاءا بالمسيره لمقر المجلس العسكرى فى العباسيه امبارح ....
اولا بس اه المجلس العسكرى ابن 60×70 و بيعمل حركات تعل .... واه هو السبب فى ان حاجات كتير من مطالب الثوره ما تنفذتشى .... بس برضوا 6ابريل مش شهداء ولا ابرياء .... كلنا عارفين مين احمد ماهر ومحمد عادل وامل شرف و الاخت كيرى .... والى مش عارف هما مين وتاريخهم ايه بكره يعرف ومش دى قضيتى دلوقتى .... انا اطمنت لما لقيت ناس جديده عرفوهم على حقيقتهم لوحدهم من غير ما نطلع القديم ونحكى الى حصل فى 2009 لما سمونا جماعة لن تمروا ...... الخلاصه لا المجلس العسكرى طيب ولا 6 ابريل شهداء .... فا ياريت ما حدش يتهمنى انى بحب فى المجلس العسكرى وبمسح ليه جوخ
المهم بقى ازاى نخصل من الى احنا فيه ده دلوقتى .... من الاول من ساعة الاستفتاء انا كنت من الناس الى قالت نعم علشان انا عايزه سلطة منتخبه تعبر عن الثوره فى اسرع وقت وعلشان كده كنت عايزه انتخابات نزيه ترحمنا من فكرة ان ثورتنا ملهاش رأس وانها كانت ثورة مطالب وده كان شئ كويس فى مرحله ما لكن دلوقى ما ينفعشى نكمل كده ..... يقوم يطلع ناس يتهمونى بالخيانه وانى ببص لمصالح حزبيه وانى من اعضاء حزب الكنبه ... كتر خرهم
طب تنحرق الانتخابات دلوقتى .... الناس الى عايزه مجلس مدنى .... ممكن يقولوا لى ازاى ها يقدروا يختاروه من غير ما يبقى فيه جيش نتركن عليه ..... ما احنا الداخليه ادنا منها والارض وكذلك الحكومه مافيش حاجه فاضله متماسكه غير الجيش ..... لما الناس راحت امبارح فى مسيرة العباسيه .... كانوا رايحين ليه .... هل كان اقتحام المكان مطلوب ولا كان بس رفع المطالب .... اظن ان لو المطالب دى كانت فضلت فى التحرير كانت هاتوصل زى ما كل حاجه كانت بتوصل
لكن تحس انى فيه ناس مش بتبص تحت رجليها ولا حتى شايفه قدمها ...... حاله من الهوس وبس .... الحماس شئ مطلوب والشجاعه شئ جميل لكن المفروض انى قبل ما اعمل حاجه افكر هل ده هايوصلنى للى انا عايزه ولا لا دى شهادة واحد من الناس الى كانوا فى العباسيه امبارح اسمه أحمد غريبه وهو اخو عمرو غريبه الى كان مخطوف امبارح " و إما هم مش فاهمين ديناميكيات خناقات الشوارع في المناطق الشعبية، أو مصرين يتجاهلوها زي ما حصل في وقائع كثير خلال اليوم، و يفسروها تفسيرات ثورية و نضالية لأنه أريح لهم و حكاية ثورة مسلية، أو يمكن ماحضروش معارك مهمة قبل كدا و لها مغزى فحبوا يعملوا لهم تاريخ."البلطجي" في النهاية هو شاب فتوة خشن مستعد للدفاع بعنف عن الحاجة ال تهمه أو موقف معتقد بصحته. زي سامبو.
في المقابل بعض من كانوا في صفوف المتظاهرين كان يتصرف بطريقة الدكر الجامد ال مش عاوز يبطل خناق علشان ما حدّش يبقى علّم عليه. واحد منهم أما زعقت له أننا مش جايين نتخانق مع الناس في منطقتهم إنما جايين مظاهرة ضد المجلس العسكري رد الرد التقليدي بتاع أي خناقة شوارع "هم ال بدأوا..أسيبهم يقولوا علي مراة!".. واحد غيره اشتبكت معه في نقاش عنيف و مع أنه كان فاهم "أننا اتجرينا للمعركة علشان يوقعا بينا و بين الأهالي و يشغلونا عن هدفنا" لكنه كان مصمم على موصلة المعركة! و مش شايف مناص منها. عارف أنه بيتورط و رافض يتصرف بذكاء.
و لاحقا أما سخنت المعركة أكثر كان بعضهم بييجي يستنهض الرجال علشان يطلعوا يحاربوا و يشتم الواقفين الرافضين يشتركوا في المعركة. في الوقت دا عرفنا بوجود مخرج عبر مستشفى كلية الطب. ساعتها مشيت.
أنا ماكنتش طايق المعركة دي و لا دعاتها المتحمسين، لأنها عبثية مالهاش أي سبب و لا يمكن نطلع من وراها بأي مكاسب. و كان رأيي أن غير الموافقين عليها لازم ينسحبوا لأن وجودهم يعطي شرعية لمثيري الحرب و يحسسهم بأنهم يدافعون عن بقية الناس ال ورا دول "علشان ما نندبحش".
أغلب معارفي كان رأيهم أنها عبثية، لكن بعضهم كان حاسس بتأنيب ضمير أنهم يتركوا معارفنا الباقيين ال كان مستحيل نجمعهم كلهم، و\أو يتركوا شباب المسيرة ال تورطوا في المعركة يواجوا مصيرهم لوحدهم، و بعضهم فعلا كان حاسس بالواجب في الدفاع..عن إيه! ماعرفش!! ماكنّاش مضطرين للمعركة، و ثاني: مافيش منها أي مكاسب، و مش ممكن ننتصر نصر واضح غير أننا نكون "علّمنا على الأهالي" قبل ما ننسحب برضه، و نكون عملنا معهم ثار.
لو كان أغلب الناس الرافضين المعركة العبثية انسحبوا زي ما كان مفروض كانت القلة الباقية من هواة المعارك هتلاقي نفسها وحدها بلا متفرجين يشهدوا بطولاتهم الوهمية و تخويناتهم للباقيين، و كانوا هيضطروا سريعا للانسحاب المحتوم..بإصابات طبعا لكنها لحد الوقت دا كانت هتبقى أقل كثير من ال الإصابات ال وقعت بسبب استمرار المعركة الساعات التالية، و أكيد بخسائر معنوي أقل كثير للمسيرة.
كانت فيه أكثر من محاولة للانسحاب بجموع المسيرة، لكنها أُحبطت بسبب الزايدات و قلق الناس المفهوم على زملائهم. واحدة منهم حاولتها أنا و خالد علي بالهتاف لكننا أسكتنا سريعا.
- بكدا، شوية منا خرّبوا اليوم ال كان ناجح، بهدف أنهم يثبتوا أنهم جامدين و بيضربوا أي حد في أي منطقة.
- أغلبنا رغم أننا كنا شايفين أننا بنتورط في معركة غير غير هدفنا لكننا عجزنا عن تصحيح المسار ﻷن أقلية سيطرت بأفعالها.
- دعاية الجيش المضادة بالتخوين و العمالة لا تختلف بتاتا في توعها و لا أثرها على بعض الناس عن خطاب بقية نظام مبارك
- واضح لي تماما أن قيادة الجيش مستعدة تضع بينا و بينها مدنيين، و مستعدين يتفرجوا علينا و احنا بنتخانق مع بعض فيما يشبه الحرب الاهلية..عادي جدا، طالما دا هيخليهم هم المسيطرين على الموقف."
بصراحه شديده الى انا شيفاه قدامى ان فى ناس شرفاء ولديهم قدر عالى من الحماس والوطنيه وبيدافعوا عن قضاياه عادله .... بيتم استغلالهم من قبل ناس هدفها دفعنا الى الهاويه ....... علشان فاكرين ان ده هايحقق ليهم مصالحهم ولكن الحقيقه انها ها تطربق فوق دماغ الكل
يا ساده كلنا متفقين اننا عايزين نخلص من حكم العسكر بس عندنا حل من اتنين سواء الانتخابات او انتخاب مجلس مدنى محتاج اننا نحافظ على تماسك الجيش علشان نقدر نعمل اى حاجه .... لكن اننا كمان نهد الجيش يبقى كده شكرا ولا هانوصل لاى حاجه
بعدين انتخاب بانتخاب ما بدل ما نعمل مجلس مدنى يعنى فتره انتقاليه تانيه ما نخلص ونعمل سلطة مدنيه منتخبه ولا هو تضيع وقت وخلاص
انا قولت الى عندى والى عايز يشتم ويشكك فى نيتى براحته والى مستعد يهدى شويه ويفكر بعقله شويه يبقى ياريت ..... ابوس ايكم اهدوا شويه وفكروا .....
** استطراد
يارب ..... يارب انت كنت معانا من يوم 25 وقبل كده وكنت دائما بتكشف الناس على حقيقتهم وفضحت مبارك بعد خطابه الاول بغبائهم فى معركة الجمل ..... يارب كمل سترك علينا وشيل الغشاوه من على عنين الناس ..... يارب احنا نزلنا علشان نمكن لدينك فى الارض وعلشان نقيم دوله عادله .... يارب ما تتخلاش عنا ..... يارب انت عارف ان مصر لو قامت الدنيا كلها حالها ها يتعدل .... والله انا ما طلبه حاجه لنفسى .... انا بس نفسى اشوف بلدنا كويسه والناس فيها مرتاحه ..... يارب احنا تعبنا قوى فى الى احنا وصلناله يارب ما ترجعناش تانى لورا ..... يارب احمينا من غبائنا و ضعف بصيرتنا
0 التعليقات:
إرسال تعليق